E Lider Kolonial

Ta asina mes, ketu bai nan tei: lidernan kolonial

E lider kolonial ta sintié mas ku su tim. Bo ta topa nan komo diktador den kompania privá òf den Gobièrnu. Tur kos mester kana manera nan ke, nan ta komuniká sin tene kuenta ku e otro. Dimes empleadonan ta obligá di traha inefisiente ku tiki di añadí den e organisashon. Nan no ta aseptá otro su opinion, paso bo mester ta sumiso komo parti di kultura di nan organisashon.

Ainda tin lider kolonial ta manehá diferente organisashon. Bo no ta rekonosé nan tur ora, paso tin diferente vershon. Na skol bo ta topa dosentenan antikuá ku ta preferá insultá alumno en bes di motivá. Miembronan di direktiva pegá den tempu. E ámtenar ku ta keda sin yuda paso e no a gusta bo tono. Mayornan ku ta ignorá deseo i nesesidat di nan yu. Tur ta lider kolonial.

Ami mes tin un alergia fuerte pa lidernan kolonial. Durante mi karera, mi a topa nan komo mi direktor, mi direktiva òf  yùfrou di skol di mi yu. E lider kolonial ta subi mi adrenalina,  mi kurason ta bati duru i mi rosea ta keda stanká. I kada bes mi ke dominá mi emoshon i reakshoná trankil pa evitá e imágen di angry black woman. Anto tòch e ta sosodé kada bes. Mi alergia ta transformá den un erupshon volkániko ku palabranan skèrpi ku ta kai manera lava kayente. Ta manera un spiritu malu ta drenta mi, i ora e sali mi ta kuminsá kuestioná. Dikon mi no por keda ketu i sumiso? Mi sa bon bon ku e lider aki nunka lo no kambia. Nan no ta konsiente di nan manera robes. Anto dikon nan lo wòri, paso semper ela bai bon bon asina tòch?

E lider kolonial ta un figura basta konosí na Kòrsou i ku nos silensio i komportashon sumiso nos ta tene na bida. Miéntras otro parti di mundu nan a realisá: e lider kolonial ta antikuá. Kaminda hóbennan ta para habri pa un mundu diverso, ku ta forma nan komo persona kritiko den sosiedat. Aki no tin duda si diálogo ku hóben i edukashon moderno ta duna mihó  resultado. Empleadonan ku kurashi ta duna nan opinion libremente. E generashon aki no tin interes di logra 10 pa 20 aña den servisio. Nan no ta adorá nan hefe, ta mas resistente i no tin miedu di lanta di un dia pa otro i kita bai.

Poko poko nos tambe ta kambiando i aseptando e mundu ei. Danki Dios ku e era di lider kolonial ta yegando su fin. Trabou ta nifiká awendia muchu mas ku gana bo pan di kada dia sin ánimo. Empleadonan ta buska plaser ku satisfakshon den nan trabou. Liderazgo den tempu moderno ta kontrali na e lider outoritario ku a keda pega den pasado. Importante ta  pa enbolbí empleadonan na un manera positivo i stimulá nan pa bai dilanti den e direkshon deseá.

Logrando éksito komo un tim.  Abo komo lider no ta e uniko eksperto, skucha otro realmente, duna i aseptá feedback na un manera konstruktivo. Ta importante tambe pa konfia i duna empleado parti di responsabilidat!

Al final nos mester konsiderá e otro komo un ser humano ku meresé rèspèt. Mundu ta kambiando rápido i nos mester realisá ku tur hende ta igual. Foi masha tempu nos no ta biba mas den tempu kolonial.

Lanta foi soño  i aktua komo un lider moderno ku otro ta sigui ku plaser i apresio.

 

Leaders must be close enough to relate to others, but far enough ahead to motivate them.

John C. Maxwell

 

Leave a Reply

Your email address will not be published. Required fields are marked *

Free First Consultation​

Tellus commodo enim risus ornare, fusce sit magna