M’a Makambiá

Asina bo yega Hulanda pa kuminsá ku bo bida komo studiante, bo ta realisá diripiente ku awor bo ta un “estranhero”. Yen gana di bai laga Kòrsou, ansioso pa konosé mundu i pa promé biaha bo ta sinti bo mes realmente un Yu di Kòrsou.  Bo ta eksperensia bo mes awor komo un hende  “diferente” den un pais konosí i tòch deskonosí. Pa surpasá e diferensia bo mester adaptá bo mes.  Bo ta djòin kombersashonnan, ku kisas no ta interesá bo, hari pa jokes ku bo no a kapta, anto subi bo baiskel den áwaseru. Warda awa pasa ta not done, paso áwaseru no ta stòp di kai nunka. No tribi di yega lat mes, paso hende ta drai wak bo ku un kara. Òf e chèns ta grandi ku nan ta reklamá bo gewon. Si: duna opinion stret ta masha normal akinan. Nan por kue bo fo’i base, paso tur tempu nos a evitá kritiká otro stret den kara òf tira puña so. Ata bo awor para tur babuká, komo estranhero den un pais friu.

Danki Dios tur kambio ta kustumbrá i asina tambe e shòk kultural di Hulanda. Ku tempu, bo por hari realmente pa nan jokes, yegamentu na ora no ta ningun problema i e kombersashonnan ta bira interesante. Kasi bo no ta sinti bo estranhero mas.

Awor e momento tan espera a yega: bo remigrashon. Porfin bo por ta bou di bo mes hendenan. Ku bo diploma den saku bo ta bai yuda bo dushi Kòrsou. Un kapítulo nobo yen perspektiva i plan bunita pa futuro.

Lástimamente e goso no ta dura largu. Promé ku bo sa , bo ta kunsumí ku e servisio malu. Bo so ta yega reunion na ora i bo ta asta duda si tin malkomprondementu. Sierto diskushonnan bo no ta komprondé mes, paso ta kiko ta nan problema anto. Ora bo ta malkontentu, bo ta ekspresá bo mes sin miedu. Pero reperkushonnan ku ta sigui ta keda inkomprendibel pa bo.  Frustra i desapuntá bo tin ku konfrontá bo realidat:   m’a makambiá

Bo no a realisá ku tur e tempu bo a madurá na Hulanda, miéntras ku bo a internalisá norma ku balornan Hulandes. Yen nostalgia bo tabata sinti bo Yu di Kòrsou, miéntras ku diariamente bo tabata download kultura Hulandes. No tabata tin otro opshon komo hóben adulto, komo ku e programa aki ta e garantia pa éksito. Ata bo awor tur konfundí para dilanti e krusada : bai Hulanda bek òf keda aki komo estranhero? Ku bo ilushon komo salbadó di bo isla natal, bo ta paketá bo maleta pa bai bek un pais frieu deskonosí pero tòch konosí.

Pa esnan tèrko ku ta keda atras, ta spera nan un otro destino. Nan por sobrebibí solamente si nan aseptá ku nan mester integrá den sosiedat. Internalisá e kultura di Kòrsou, ku nan a deskustumbrá for di dje. Ku esaki mi no kiermen kome funchi ku yambo, bebe Amstel Bright na snek, seú ku karnaval. No, mi ta referí na e manera di trata otro, importansia di kolektividat ku konsekuensia pa desishonnan importante, relashonnan herárkiko i tur e balornan ku ta representá rèspèt.

 

Leave a Reply

Your email address will not be published. Required fields are marked *

Free First Consultation​

Tellus commodo enim risus ornare, fusce sit magna