Aña pasa dos studiante a aserká mi pa yuda nan ku idioma Hulandes pa skol. Na promé instante nan a puntra kuantu mi ta kobra i naturalmente mi no por a kobra nan mi tarifa di consultant. Na su lugá mi a pidi un studiante pa eiskrim i pa mi konsenshi mi a pidi e otro fruta. Ku smak mi a hinka basta ora den korekshon di nan Hulandes. Paso mi no ta lubidá kon hende a yuda mi den pasado ku mi Hulandes di “intensive care”.
E siguiente dia, mayornan gradesido di esun studiante a trese eiskrim pa mi na kas. Mi a haña asina great ku nan a hasi esfuerso. E otro studiante a yama mi danki i a primintí mi ku pronto e ta bai trese fruta. I asina e studiantenan a keda aserká mi vários biaha pa ayudo. Pero e fruta si no a yega nunka. Tur siman mi ta kumpra fruta pa kas, pero tòch e promesa di fruta a keda molostiá mi. Paso e idea di kumpra fruta tabata tin mas bien di aber ku e gesto.
Ora e studiante a aserká mi un biaha mas, mi a tòch bis’e ku e situashon tabata molostiá mi. Un promesa di fruta kèns diripiente a para bira un problema gigante. El a splika mi ku e kier a kumpra un regalo mas karu pa mi na Bed Bath and Bodyworks, pero e no tabata tin sufisiente sèn. Pa e motibu aki el keda posponé e promesa di fruta. Mi a splik’e tokante e esensia di un gesto. E gesto no mester ta grandi ni karu, paso importante ta keda e echo ku e persona a tuma e molèster.
Hopi biaha nos ta lubidá e importansia di promesa. Kuantu biaha mayornan no ta lubidá promesa ku nan ta hasi nan yu ? Si bo rapòrt sali bon, mi ta duna bo tòrnu ku bolbe….i tòch kada bes nan ta lubidá. E lotgiter ku ta primintí bo di pasa mèrdia, pero ta keda sin bini i ta gewon sera su telefòn. Matrimonio ku ta kaba den divorsio, pa promesanan ku no a keda kumpli. Parehanan ta primintí fieldat pa semper, pero no por resistí e tentashon den bida. Tiki biaha nos ta para ketu i kuestioná si e promesa ta realístiko. Paso ta masha dushi i fásil pa djis hasi un promesa i duna e otro speransa.
Asina mi a tende tantísimo promesa di polítikonan pa hopi aña. Durante kada periodo di kampaña polítiko nos ta bolbe haña speransa, paso awor realmente ta bini kambio. Mi a lesa diferente programa di gobernashon fantástiko. Plannan di Gobièrnu impreshonante. Pero tiki di nan a ser kumpli. Netamente esaki ta kibra e pueblo su konfiansa i ta hasi e pueblo síniko.
Paso realidat ta otro for di loke nos tin gana di kere. Ekonomia di Kòrsou lo no krese den un frega di wowo. Meskos ku kuponan di trabou. Anto lamentablemente e ònderstant tambe lo keda riba un nivel inaseptabel. Paso lástimamente no ta eksistí héroenan ku por usa nan stòki mágiko pa drecha Kòrsou.
Pa nos ban bèk riba e tópiko di promesa: no tin nada malu ku e idea di promesa, paso e por duna hende speransa ku fortalesa. Pa nos polítikonan tambe ta konta, ku e promesa no mester ta grandi ni impreshonante. Paso nos por kana yega ku pasonan chikí, pero konkreto. Importante ta ku nan ta realístiko, pa por krea konfiansa ku nos por otro. Paso bida ta basta simpel.
Pa loke ta trata ami mes, mi no ke niun regalo karu di Bath and Body Works. Ku djis dos apel ku un bakoba bo ta krea konfiansa i lo mi ta dispuesto pa move shelu i tera pa bo.