Sometimes in Curacao

Djadumingu último, mi no tabata tin gana di kushina i maske mi no ta amante di kumpra kuminda riba kaya, mi a bestèl un pizza pa nos den kas. Mi yamada simpel pa bestèl un pizza a resultá den un kombersashon masha dushi mes. E empleado a kumindá mi yen zjeitu infektando mi ku su ánimo. Tabata manera el kaba di sera konosí ku un amiga nobo. El a sugerí pa bestèl algu di bebe, paso imposibel ku mi por a kome un pizza grandi asina ku mi boka seku. Su proposishon pa kumpra un kesio tabata zona asina atraktivo ku kasi mi a lubidá mi bolo den frishidèr. Anto ku mesun zjeitu mi tambe a kontestá.

Ora mi a sera telefòn, mi yu hòmber a dal un gritu hari. Only in Curaçao, kaminda un simpel pedido por resultá den un kombersashon prèt. Si only in Curaçao, asina mi tin mas.

Only in Curaçao: un lugá ku konosé telefonistanan ku mal manera. Nan ta kontestá bo gewon “no” manera nan ta orguyoso ku nan no por yuda bo. E kontesta “mi no sa”, tampoko no ta un eksepshon. Anto si bo sigui puntra, nan por asta kue un fada ku bo. Anto ainda mi no a menshoná e kaheranan den supermerkado, ku no ta ni hisa kara wak bo pa kumindá.  Si, only in Curaçao, kaminda pakusnan ta sera 10 minüt promé ku ora, paso personal a haña gana di bai kas. Asina aki mi por konta muchu mas.

Kisas e ta zona straño. Pero e momentonan eksepshonal ku un persona trata mi bon i servisial te yena mi kurason ku alegria. Desde awe mi ta bai kambia only in Curaçao pa sometimes in Curaçao. Si sometimes nos ta funshoná tremendo i organisá marcha di karnaval impreshonante. Tin ora bo ta topa empleado den pakus ku ta yuda bo ku smak. Pa basta tempu nos no mester reklamá servisio malu di Kranshi mas. Nos ta asta risibí un rekordatorio pa kùr outo i nos ta kaba den 15 minüt. Aña aden i aña afó nos por a disfrutá di un Curaçao North Sea Jazz Festival tremendo organisá. E trayekto di bakunashon ta kana sublime  i masha efisiente. Si sometimes in Curaçao, nos ta traha plùs trata otro tremendo ku nos mes ta keda asombrá. Paso nos por bon bon i nos tin e potensial.

Laga nos stimulá e susesonan aki i aploudí nan kada bes,  pa asina den futuro nos por remplasá sometimes pa everytime .

Facebook
Twitter
LinkedIn

Leave a Reply

Your email address will not be published. Required fields are marked *