Konmemorashon

Pa hopi aña kaba mi a pens’é,  pero sin ke atmití:

Mi no tin lei ku konmemorashon.

Até mi a bisé. Kisas mi ta kibuká òf fresku. Manera semper nan ta laga sa. Pero mi mester a atmití pa mi mes i awor tuma e kurashi pa ekspresá.

Konmemorashon di trinta di mei, lucha pa libertat, selebrashon dia di bandera i hopi mas. Tantu biaha mi a mira nan; momentonan solèm ku mandatarionan bachá, sintá promé rei. Dunando honor na e héroe òf momento históriko. E spichnan ta maravioso. Ku smak nos ta sinta skucha palabranan di “medewerkers” i hopi biaha esun na palabra mes no sa niun pátaka. Momentonan emoshonal ku palabranan di elogio i determinashon. Artistanan ta presentá kantika di patriotismo i nos ta sinti nos mes temporalmente preokupá pa e hendenan den nos pais. Pa djis un momento nos a logra di stima Kòrsou.

Seguidamente e públiko ta aploudí sin kuestioná e kambio real ku mester tuma lugá. Esun ku tribi di bira kritiko ta fèrfelu i no ta wòrdu invitá e siguiente biaha. P’esei niun hende no ta kuestioná:

  • konkretamente kon?
  • spesífikamente ki dia?
  • práktikamente ki manera?

 

Kalor a dal aden, porfin a yega final di e parti formal i por muhá e boka seku i vigilá e waiter ku pasapalu pa ousiliá e stoma ku ta gruña pa basta ratu kaba. Ban spera ku e serbes ta bon friu. Ambiente a dal aden i tur hende a lubidá e tópiko di momento i preokupashonnan di bida diario i pensamentunan personal ta dominá. Djis un komedia, pasó al final e tabata un dia meskos ku tur dia.

Tula warda, no wak ainda, ya ku nos tin algun kos di drecha

Apesar di loke pa añanan mi a eksperensiá, mi ta keda ku speransa. Pasó un dia lo mi haña un invitashon di un konmemorashon ku metanan konkreto i un programa di akshon. E siguiente aña, nos ta evaluá durante nos spich e resultadonan di e aña konserní. E dia ei lo mi aploudí ku smak i aseptá ku mi ta kibuká. Lo mi haña lei bèk ku konmemorashon, pasó nos a rekordá ayera i stipulá metanan pa fortifiká mañan.

ma tur kos ku por drecha nos tin tinu pe

ma tur kos ku lo kambia nos tin tinu pe

 

 

 

2 reacties

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *

Free First Consultation​

Tellus commodo enim risus ornare, fusce sit magna